台灣藝人「小鬼」黃鴻升於去年今日猝逝，終年36歲。離開一年，一班好友及粉絲以不同方式悼念，其中楊丞琳就轉發佢同許瑋甯以及另外幾位「華岡藝校」好友嘅照片悼念小鬼。
小鬼家人今日舉行紀念展覽，展出小鬼未曾公開嘅300件藝術作品，楊丞琳雖然未能親身支持，但不忘為展覽宣傳，呼籲台灣粉絲到場：「我不在台北，無法親自前往，請你們務必代替我去支持他。」除咗到場支持展覽，有粉絲更專誠到黃鴻升嘅墓園獻花，送上月餅同佢生前鍾意飲嘅可樂。
生前一齊主持《綜藝玩很大》嘅好兄弟KID（林柏昇），聯同小鬼經理人Dino、好友坤達及工作人員等，再次登上佢地曾經同小鬼一齊登頂嘅台灣百岳合歡山，將呢段登山過程拍低，懷念同回憶呢段同小鬼一齊登頂嘅道路，更加插小鬼生前片段，並將片長剪成1:09:16，悼念小鬼9月16日逝世，令一眾網友非常感動。
Search